Skip to main content

குதிரை இல்லாத ராஜகுமாரன் -ஒரு நோக்கு -கோமகன்.



ஓர் சிறுகதைத்தொகுதியை வாசிக்கும் பொழுது அதன் ஊடாக வருகின்ற புரிதல்கள் /கிரகிப்புகள் வாசகனுக்கு வாசகன் வேறுபடும் அந்தவகையில் அண்மையில் கனடாவில் வதியும் ராஜாஜி ராஜகோபாலனின் "குதிரை இல்லாத ராஜகுமாரன் " சிறுகதைத்தொகுதி என்னுள் ஏற்படுத்திய அலைகளை பதியலாம் என எண்ணுகின்றேன்.ராஜகுமாரன் என்றாலே வெண்புரவி அல்லது கரும்புரவியில் ஓர் கம்ரபீமான தோற்றத்துடன் ராஜபாட்டையில் குளம்பொலியுடன் கடுகி விரைவார். அனால் இங்கு குதிரையே இல்லை.இந்த ராஜகுமாரன் எப்படி இருக்கப்போகின்றாரோ என்ற ஐயப்பாட்டுடன் சிறுகதைத்தொகுதியில் உலா வந்தேன்.இந்த சிறுகதைத்தொகுப்பில் மொத்தம் பதினைந்து சிறுகதைகள் பல்வகை ரசங்களுடன் வெளியாகி இருக்கின்றன.

நிகழ்காலத்தில் தொலைந்ததை பிடிக்க ஓடிக்கொண்டிருக்கும் நாங்கள் எமது வாழ்க்கையின் அனுபவங்களைச் தொலைக்கச்செய்கின்றோம் ஆனால் யாருமற்ற தனிமையில் இருக்கும் பொழுது அந்தத் தொலைந்த அனுபவக் குப்பைகளைக் கிளறிப் பார்த்தால், காலமாற்றங்களினால் தூக்கிப் போட்ட கனவுகளும், இழந்துவிட்ட உண்மையான நம்முடைய முகங்களும், இழந்துவிட்ட வாய்ப்புகளும், வலிகளும், வேதனைகளும், காதலும், தோல்வியும், சந்தோஷங்களும் இருக்கும். இப்படியான கதை சொல்லிகளையும் கதை மாந்தர்களையும் குதிரை இல்லாத ராஜகுமாரனில் பயணிக்கும்பொழுது கிரகிக்க முடிந்தது.

பொதுவாகவே நேரிய பாதையில் செல்லும் வாழ்க்கை முறைமை என்பது யாருக்குமே சாத்தியமாவதில்லை. கிறிஸ்துவுக்கு முன் அல்லது பின் என்பதைப்போல எல்லோருக்குமே திருமணத்துக்கு முன், திருமணத்துக்குப் பின் என்று இந்த உலகில் இருக்கின்ற அனைத்து மாந்தர்களுக்குமே இரட்டைபடையான வாழ்க்கைதான் நிரந்தரமமாக இருக்கின்றது.குதிரை இல்லாத ராஜகுமாரனும் இதையே கதைக்களங்களை கொண்டிருக்கின்றது.

குதிரை இல்லாத ராஜகுமாரநின் ராஜபாட்டையானது : மண்வாசனைகளையும் அதுசார் வெளிப்பாடுகளைக் கொண்ட "கறுத்தக்கொழும்பான்" ,"தெற்காலை போற ஒழுங்கை","ஆசை வெட்கம் அறியும்" என்ற ராஜபாட்டையாகவும்,

தத்துவம் ,நிதிகளை சொல்கின்ற ( போதனை)"பத்தியம் ",விழிப்புகள் "கடவுளும் கோபாலப்பிள்ளையும்" என்ற ராஜபாட்டையாகவும்,

ஆண்-பெண் உறவு காதல் பற்றி சொல்கின்ற "பௌரஷம்","நிழலைத்தேடும் நிழல்கள் ",ஆதலினால் காமம் செய்வீர்","குதிரை இல்லாத ராஜகுமாரன் ","செம்பருத்தி","சுபத்திராவுக்கு என்ன நடந்துவிட்டது? " என்ற ராஜபாட்டையாகவும்,

கிளை விதிகளாக ,"மௌனத்தின் சப்தங்கள் ","மேலும் சில கேள்விகள் " என்று பல ராஜபாட்டைகளில் என்னால் வலம்வர முடிந்தது.

இதில் கடவுளும் கோபாலப்பிள்ளையும் என்ற கதையை ஆராயலாம் என எண்ணுகின்றேன்.இந்தக்கதையானது கனடாவில் வாழும் ஒருவருக்கு வேதாகமத்தில் வரும் தேவகுமாரன் போல் கடவுள் காட்சி தந்து உரையாடுவது போல கதைக்களம் நகருகின்றது.இந்தக்கதையின் உள்ளடக்கத்தை என்னால் ஏற்றுக்கொள்ள முடியவில்லை.முற்றுமுழுதாகவே நிராகரிக்கின்றேன்.மானிட குலத்துக்கு கடவுள் காட்சி தருவாரென்றால் இந்த உலகில் பல பிரச்சனைகள் இல்லாதொழிந்திருக்க வேண்டும்.ஆனால் பிரச்சனைகள் பிரச்சனைகளாகவே இருக்கின்றன.அத்துடன் புலம்பெயர்நாடுகளில் குறி சொல்லுதல் சாத்திரம் பார்த்தல் என்று ஏலவே பல வியாபாரிகள் சனங்களை மயக்கி வைத்து இருக்கின்ற வேளையில் இது போன்ற பழமைவாத சிந்தனைகளில் அமிழ்ந்து கொண்டிருக்கும் புலம்பெயர் வாசிகளுக்கு இந்த கதை ஊக்கியாகவே இருக்கின்றது.இது தவிர்த்து இந்தக்கதையில் வேறு எதையும் என்னால் கிரகிக்க முடியவில்லை.

இந்த சிறுகதைத்தொகுதியில் வருகின்ற கதைக்களங்களும் கதைமாந்தர்களும் நிகழ்காலத்தில் பயணித்தாலும் .கதை சொல்லிகளின் மீது கதையாசிரியர் கையாண்டிருக்கும் சொல்லாடல்கள் அதுவும் பெண்கள் மீது வைக்கும் வர்ணனைகள் அரத்தல் பழசாகவே இருந்து வாசிக்கின்ற பொழுது ஒருவித ஆயாசத்தைத் தருகின்றது.அதே போல் கதைக்குரிய தலையங்கங்கள் சினிமாவில் வருகின்ற தலைப்புக்கள் போலவே இருக்கின்றது.உதாரணமாக சுபத்திராவுக்கு என்ன நடந்து விட்டது? , நிழலைத் தேடும் நிழல்கள் போன்றவை.

"தெற்காலை போற ஒழுங்கை" என்ற கதையில் சாதிகுறைந்த ஓர் குடும்பத்தின் பொருளாதார பிரச்சனைகளை ஓர் உயர்குடியில் பிறந்து அந்தக்குடும்பத்துக்கு வந்த மருமகள் தீர்த்து வைப்பதாக நுலாசிரியர் சொல்கின்றார். இதன் மூலம் உயர்குடியில் பிறந்தவர்கள் நற்பண்புகளையும் இழிகுடியில் பிறந்தவர்கள் அதற்கு நேரெதிராகவே இருக்கின்றார்கள் மறைமுகமாக உணர்த்துவதாகவே எடுக்க முடிகின்றது.இந்த இடம் ஓர் விவாதத்திற்குரிய பொருளாக மாறுகின்றது.

"மௌனத்தின் சப்தங்கள் " கதை என்னுள் ஓர் அதிர்வை ஏற்படுத்தியது. அதிலிருந்து விலக நாட்கள் எடுத்தன.மண்வாசம் தெறிக்கும் சொல்லாடலில் ஓர் பூசாரி+பரியாரி-யின் வாழ்வில் உள்ள அகச்சிக்கல்களையும் அவரது மகனில் அவர் வைத்திருக்கும் அளவில்லா பாசத்தையும் இறுதியில் மகன் நோய்வாய்ப்படும் பொழுது அதைக்காணச் சகியாது தனது கையினாலேயே நச்சு மூலிகைகளைக் கொடுத்துக் கொடுத்துக் கருணைக்கொலை செய்வதைக் கதை விபரிக்கின்றது.இந்தக்கதையில் கிளைப்பாத்திரமாக வரும் அன்னம்மா மூலம் கிராமத்தில் நடக்கும் இட்டுக்கட்டல்களை தனக்கே உரிய பாணியில் நூலாசிரியர் விபரித்தது இந்தக்கதைக்கு உயிர் ஊட்டியது என்றே எண்ணத்தோன்றுகின்றது.என்னளவில் இந்தச் சிறுகதைத்தொகுப்பில் இருந்த கதைகள் ஒருசிலதே பேசக்கூடியதாக இருக்கின்றன மற்றையவை சிறுகதைத்தொகுதியின் தலைப்புக்கேற்பவே இருக்கின்றன.

ஒர் கதைக்களத்தையோ இல்லை கதைமாந்தர்களைக் கதாசிரியர் தேர்ந்தெடுக்கும் பொழுது அதன் வெளிப்பரப்பை மட்டும் ஆராயமல் அக்காலத்தில் வாழும் மனிதர்களின் அகசிக்கல்களையும் விவாதிக்க வேண்டும் என்கிற எதிர்ப்பார்ப்புகள் நான் பயணித்த இந்த சிறுகதைத்தொகுதியில் அருந்தலாகவே காணப்பட்டன.ஓர் சிறந்த கதை சொல்லியான ராஜாஜி ராஜகோபாலன் இந்த சிறுகதை தொகுதியில் ‘குதிரை இல்லாத ராஜகுமாரனாகவே’ இருக்கின்றார்.ஆனாலும் இனிவருங்காலங்களில் தனது கதை சொல்லும் உத்திகளில் மாற்றங்களைக் கொண்டுவருவார் என்று நம்புகின்றேன்.

நூலின் பெயர்:குதிரை இல்லாத ராஜகுமாரன்

நூலின் வகை: சிறுகதைத்தொகுதி

நூலாசிரியர்: ராஜாஜி ராஜகோபாலன்


விலை: 200 இந்திய ரூபாய்கள்
வெளியீடு: சுதர்சன் புக்ஸ்
74 மணிமேடை கீழ் புறம்
நாகர்கோவில் 629001
தமிழ்நாடு

தினகரன் 23 ஐப்பசி 2016
Post a Comment

Popular posts from this blog

"சமூகம் எனக்கு என்ன தந்தது என்பதை விட நான் என்ன சமூகத்திற்கு கொடுத்தேன் என்பதை சிந்திக்கவே நான் விரும்புகின்றேன் ". புலோலியூரான் - நேர்காணல்.

ஈழத்தின் வடமாராட்சி பகுதியான தம்பசிட்டியில் பிறந்து ஜெர்மனி டுசில்டோர்ஃப்,  (Düsseldorf) நகரில் வாழ்ந்து வரும் டேவிட் யோகேசன் புலம் பெயர் இலக்கியப்பரப்பில் "புலோலியூரான்" என்ற புனை பெயரில் அறிமுகமானவர். இவருடைய ஆக்கங்கள் இதுவரை இலக்கியப் பரப்பில் ஆவணப்படுத்தாவிட்டாலும், ஓர் சிறந்த அறிவியல் சிந்தனையாளராகவும் , கணணியியல், பொருளாதாரம், திட்டமிடல், நிதி துறை சார் வல்லுனராகவும் ,அரசியல் செயற்பாட்டாளராகவும்  ,பயிற்சி விமான ஓட்டியாகவும் , ஜேர்மன் அரசினது ஆரம்பகால கணணி மென்பொருள்துறை ஆலோசகராகவும் ஆசிய, வளைகுடா மற்றும் ஆபிரிக்க தேசங்களில் பொருளாதாரம், திட்டமிடல், நிதி ஆலோசகராக என்று பன்முகப்படுத்தப்பட்ட இளைய தலைமுறையை சேர்ந்த புலோலியூரானை வாசகர்களுக்காக பல கட்ட மின்னஞ்சல் பரிவர்த்தனைகள் மூலம் நான் கண்ட நேர்காணல் இது .............
கோமகன்














000000000000000000000000000000000000
உங்களை நான் எவ்வாறு தெரிந்து கொள்ள முடியும்?
" மன்னிக்கவும், நீங்கள் யார் என சொல்லுங்கள்?"!! இலங்கையில் இருந்து ஜேர்மன் வரை நான் அடிக்கடி எதிர்கொண்ட கேள்விகளில் ஒன்று இது. என் வாழ்க்கையில் நான் எதிர்கொண்ட எனக…

"ஆண்கள் உடல்அரசியலைப் பேசலாம் என்றால்,பெண்கள் ஏன் உடலரசியலைப் பாடக்கூடாது"?-நேர்காணல் புஷ்பராணி சிதம்பரி.

ஈழத்தின் வடபுலத்தில்  மயிலிட்டிக் கிராமத்தைப் பிறப்பிடமாகக் கொண்டு தற்பொழுது பிரான்ஸில் வசித்து வரும்  புஷ்பராணி, தமிழ் ஈழ விடுதலைப் போராட்டத்தின் ஆரம்பகால  அமைப்புகளான தமிழ் இளைஞர் பேரவையிலும்,அதன் பின்னர் தமிழ் ஈழ விடுதலை இயக்கத்திலும் (TLO) இயங்கிய பெண்போராளி ஆவார். அத்துடன் இவர் தமிழ் இளைஞர் பேரவையின் மகளிர் பிரிவுக்கு  அமைப்பாளராக இருந்திருக்கின்றார். ஆயுதம் தாங்கிய தமிழ் ஈழத்தேசியவிடுதலைப்  போராட்ட வரலாறில் முதன் முதலாகச்  சிறை சென்ற இரு பெண்போராளிகளில் ஒருவராக எம்மிடையே அடையாளப்படுத்துள்ளார். இவர் பல்வேறு தளங்களில் இருந்தவர்களுடனும், அன்றிருந்த தமிழ் ஈழத்தேசிய விடுதலைப்போராட்ட  இயக்கங்களின் தலைமைப் பொறுப்புகளில் இருந்தவர்களுடனும், அவர்கள் அந்தப் பொறுப்புகளுக்கு வருவதற்கு முன்பாகவே அவர்களுடன் ஒன்றிணைந்து  தமிழீழ விடுதலைப்போராட்டத்தில் ஓர் சக போராளியாக இருந்திருக்கின்றார். இந்த விடுதலைப்போராட்டத்தில்  பலவிதமான சித்திரவதைகளையும் சாதியரீதியாக  ஒடுக்குமுறையையும் சந்தித்தவர் புஷ்பராணி சிதம்பரி. அன்றைய காலகட்டத்தில் இருந்த சாத்வீகப்  போராட்டத்தில் நம்பிக்கை இழந்த இளைய தலைமுறையினருடன் …

"கலை உண்மையைப் பேசவேண்டும் ; கலைஞனும் உண்மையின் பக்கத்திலேயே நிற்க வேண்டும்" - நேர்காணல் யேசுராசா.

அ.யேசுராசா  தாயகத்தின்  குறிப்பிடத்தக்க கவிஞர், சிறுகதையாசிரியர், விமர்சகர், இதழாசிரியர் மற்றும் பதிப்பாளர் என்று பன்முக ஆளுமை  படைப்பாளி . 1968 முதல் கவிதைகள், சிறுகதைகள், மொழிபெயர்ப்பு, பத்தி எழுத்துக்கள், விமர்சனம் போன்ற பல தளங்களில் தீவிரமாக இயங்கிவரும் அ .யேசுராசா கலை, இலக்கியங்கள் அனுபவ வெளிப்பாடாய் அமையவேண்டுமென்பதிலும், கலை இலக்கிய உலகில் அறம்சார்ந்த நிலைப்பாடு பேணப்பட வேண்டுமென்பதிலும் உறுதிகொண்டதோர் இலக்கியவாதி . அத்துடன் நின்றுவிடாது யாழ். திரைப்பட வட்டம், யாழ். பல்கலைக்கழக புறநிலைப் படிப்புகள் அலகின் திரைப்பட வட்டம் என்பவற்றில் தீவிரச் செயற்பாட்டாளராக இருந்திருக்கின்றார் .
பதினொரு ஈழத்துக் கவிஞர்கள், மரணத்துள் வாழ்வோம், தேடலும் படைப்புலகமும் ஆகிய நூல்களின் தொகுப்பாளர்களில் ஒருவராகவும் . காலம் எழுதிய வரிகள் கவிதைத் தொகுதியின் தொகுப்பாளராகவும் . அலை சிற்றேட்டில் முதலில் ஆசிரியர் குழுவிலும் - நிர்வாக ஆசிரியராகவும் பின்னர் 25ஆவது இதழிலிருந்து ஆசிரியராகவும் இருந்த அ .ஜேசுராசா , இளைய தலைமுறையினரின் வளர்ச்சியை இலக்காகக் கொண்டு கவிதை, தெரிதல் ஆகிய இதழ்களை வெளியிட்டு அவற்றின் ஆசிரிய…